KUCHING: Sarawak sedia nurun ke kelang e-lumba global ari sukut ngatur enggau atlit ngambi bagi ari kandang menua tu.
 
Sapit Menteri Dagang Temuai, Industri Kreatif Enggau Seni Pemerindang Sarawak, Datuk Snowdan Lawan madah, industri e-lumba di kandang menua tu majak dikelala kelebih agi ari pengawa ngatur Ekspo E-Lumba Sarawak 2024 (SAREX24) ti udah marit ukai semina Sarawak aja tang selampur Malaysia, nyengkaum menua luar baka Brunei Darussalam, Kemboja, Indonesia enggau Thailand.
 
Iya madah, pemujur nya nunjukka e-lumba diatu ukai semina main video aja, tang nyadi ekosistem ti ngerembai enggau meransang pengawa besemekih, inovasyen enggau pelajar.
 
“Pengawa ngatur pengawa baka SAREX24 udah numbuhka pelasar ti majak beguna dikena narak penau, nempa rentayan industri enggau meransang pengawa nyadi orang dagang.
 
“Kami pechaya e-lumba ulih nyadi penyungkak ngagai ekonomi tumbuh, meri bemacham peluang nyadi pemain, jurulatih, pengatur pekit enggau mega pengawa baka penabur, penengkebang isi enggau pemansang main,” ku iya.
 
Iya nyebut jaku nya ba Pengawa Nutup SAREX24 ti diatur di Balai Komuniti Majlis Bandaraya Kuching Selatan (Mbks) kena Hari Minggu.
 
Iya madah, timbal ti chukup manah lebuh ngatur serak tu mega ngerandang peluang Sarawak nyadi hab pengemudi e-lumba dalam Malaysia enggau antarabansa.
 
Ba Pekit Mobile Legends: Bang Bang (MLBB), tim Foxura menggi gelar champion lalu mai pulai perais mata duit RM7,000 enggau midul.
 
Seraya N3 Tanjong Datu enggau Od Esports ba penuduk kedua enggau ketiga, bela nerima perais mata duit RM4,500 enggau RM2,500 sereta midul.
 
Pekit Pubg Mobile udah meda gelar champion, lumur dua enggau tiga diempu Team52, SBD Vicious enggau MPFEC lalu tiga tim nya nerima perais mata duit RM15,000, RM9,000 enggau RM5,000.
 
Pekit bukai ke bela diatur sekumbang tiga hari SAREX24 tu nyengkaum Tekken 8 enggau rFactor2 Sim Racing ti nyendiaka semua perais sepenyampau RM7,000 ba tetiap pekit.
 
Ngerichahka agi pekit nya, raban pengatur mega bisi ngatur pekit ‘cosplay’ ti nyendiaka perais manggai RM11,000.
 
SAREX24 belabuh diatur kena 13 Disember tu tadi mujur tembu kemari enggau penatai bala pemain sereta penyampau semua perais ti manggai RM80,000. – EDISI UKAS