KUCHING: Sarawak sesingkang ba mua dalam sektor kuasa ulih dikemaru dibanding nengeri bukai di Malaysia.
 
Sapit Menteri Besai, Dato' Sri Fadillah Yusof madah, Sarawak udah nyapai lebih 60 peratus pemansang dalam sektor kuasa ulih dikemaru nengah kuasa hidro, kuasa solar, tekat ai beringkat enggau biojisim.
 
“Di Semenanjung semina nyapai 20 peratus ungkup kuasa ulih dikemaru tang laban din nadai mayuh sungai dia semina meri perati ngagai kuasa solar.
 
“Taja pia, kitai keran begulai nyadi siti menua manggai taun 2050 nyapai juluk nadai karbon ti mega nyadi agenda besai ngagai semua nengeri di tikas nasional ngambi juluk nya nyadi nyata,” terang iya.
 
Iya nerang pekara nya rambau Pengerami Ngaul Media 2024 (Sarawak) di sebuah hotel tebilang ditu kena Hari Minggu.
 
Berebak enggau nya, Menteri Idar Kuasa enggau Transformasyen Ai nya madah, opis menteri sida deka terus nyukung Perintah Sarawak dalam projek ngaul utiliti ai ari meri geran tauka jali.
 
Iya madah, nya siti ari tanggungpengawa nyadi opis menteri di renggat Perintah Besai enggau bejalaika bemacham program sukung nengah geran tauka jali ngagai raban perintah nengeri di selampur Malaysia.
 
“Enti di Sarawak, entara program jali ti dipejalaika kitai ti meri empas lebuh dipejalai iya nya batang paip dalam ai di Kuching iya nya ngerawang dalam tanah dipejalai ngelingi mengeri ke alai semua projek nya proses ngaga engkelebat ke diatu benung digaga nyengkaum sitak Petra Jaya.
 
“Diatu pengawa nya deka masuk renggat ketiga ti mungkur sitak di Kuching Utara enggau Kuching Selatan kelimpah sitak menua bukai,” ku iya.
 
Sama Datai Kaban Kunsil Nengeri (ADUN) Stakan, Datuk Hamzah Brahim; Tuai Sekretari Opis Menteri Idar Kuasa enggau Transformasyen Ai (PETRA), Dato Mad Zaidi Mohd Karli; Bala Sapit Sekretari PETRA; Direktor Opis Parit enggau Entali Ai, Datu Ir Ts Ahmad Denney Ahmad Fauzi; Direktor Opis Pemadah Sarawak, Helmy Hamid; Tuai Biro BERNAMA Sarawak, Hamdan Ismail; Tuai Pegawai Eksekutif Angkatan Zaman Mangsang (Azam), Ali Suhaili; Chairman Serakup Pemberita Bagi Menua Kuching (KDJA), Ronnie Teo sereta pemekuh media ke bukai.  – EDISI UKAS