TOKYO: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg likun datai di Tokyo, Jipun kena Hari Minggu ungkup pejalai gawa pengelama Lima Hari.
Iya begulai enggau raban diligit Perintah Sarawak nepan bilun khas datai di Padang Bilun Antarabansa Haneda, Tokyo urung pukul 6.15 lemai jam menua nya.
Ngelalu penatai iya di hotel iya nya Duta Besai Malaysia Ke Jipun, Dato' Shahril Effendi Abd Ghany, Dua Sapit Premier Sarawak, Datuk Amar Awang Tengah Ali Hasan enggau Datuk Amar Dr Sim Kui Hian, Menteri Utiliti enggau Telekomunikasyen Sarawak, Dato Sri Julaihi Narawi, Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh enggau Sapit Menteri Kuasa enggau Pemeruan Rampa Menua Datuk Dr Hazland Abang Hipni.
Bela ngelalu penatai Premier Sarawak iya nya Luyar Besai Sarawak, Dato Sri Saferi Ali, Sekretari Pekara Wang Sarawak, Dato Sri Dr Wan Lizozman Wan Omar, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, Tuai Sekretari Politik Premier Sarawak, Dato Fazzrudin Abdul Rahman sereta bala pegawai kanan Perintah Sarawak.
Ba hari keterubah, Premier Sarawak disadang ngatur penemuai gawa ke ENEOS Central Technical Research Laboratory.
Nyadi sebuah kompeni ti meri bekal 20 peratus ari bekal kuasa Jipun, ENEOS bisi juluk ngangkatka kuasa rebak nangkan ke tu baka hidrogen, bahan api sintetik, enggau biofuel nyadi 'norma dudi hari’ dikena nyapai komuniti neutral karbon.
Iya udah nya disadang ngulu sekeda aum begulai enggau ENEOS Corporation And Jx Nippon Oil & Gas Exploration Corporation, Japan Bank For International Cooperation (JBIC), Sumitomo Corporation, Japan Organization For Metals And Energy Security (JOGMEC) enggau Opis Menteri Ekonomi, Dagang Enggau Industri (METI), Jipun.
Pejalai gawa Premier Sarawak ditampung ba hari kedua enggau aum begulai enggau raban Boeing Japan bekaul Bahan Api Penerebai Meruan (saf) sereta pemansang enggau pansik bekaul.
Udah nya iya enggau raban diligit Perintah Sarawak ngatur aum begulai enggau Highchem Co. Ltd, Integrated Design & Engineering Holdings Co.Ltd. (ID&E), Mitsubishi Corporation, Mitsui OSK Line sebedau ngulu Pengawa Nyain Sempekat Pemereti Ati (MoU) entara Bintulu Development Authority enggau Pertama Ferroalloy/ Asia Minerals.
Datai ba hari ketiga pejalai gawa nya, Premier Sarawak enggau bala diligit deka ke Tokyo Gas Yokohama Techno Station ti nyadi siti fasiliti model ungkup pengeluar enggau ngena hidrogen enggau e-metana, sereta model ngerembai CO2, enggau dikerembai ke selampur Jipun.
Ba hari keempat, Premier Sarawak sereta bala bukai deka Ngelawa Mitsubishi Power Takasago Plant.
Taman hidrogen nya siti fasiliti canggih ti digaga ungkup ngenuku teknologi hidrogen dikena mantu proses nyahkarbonisasi global lalu nya nyadi fasiliti besai di dunya ti nyerangkung semua rentayan hidrogen: pengeluar, nyimpan, enggau ngena.
Taman hidrogen tu mega endur sistem pemadu maju, nyengkaum elektrolizer besai enggau teknologi rebak dudi baka elektrolisis oksida pepejal enggau pengeluar hidrogen turquoise, ti mansutka hidrogen nadai mansutka CO₂.
Inovasyen tu diuji ngena turbin ti bekenaka kuasa hidrogen, ulih besemekih ba makit komersial hidrogen nyadi pemansut kuasa ti meruan.
Premier sarawak disadang ngujungka pejalai gawa kena 20 disember tu sebedau mupuk pulai. - Edisi Ukas
