DEBAK: Debak Fest @ Marvelous Food Fest 2024 ti diatur pengelama empat hari, belabuh 4 Disember tu tadi ngerikod penatai lebih 15,000 pengusung.
 
Program ninting taun tu ukai semina richah enggau bemacham aktiviti tang mega nyadi pelasar nyungkak ekonomi peranak lokal nengah kerejasama enggau Marvelous Food Festival Management.
 
Sapit Menteri Pemansang Pengelantang Komuniti Sarawak ke mega Kaban Kunsil Nengeri (ADUN) Saribas, Datuk Mohammad Razi Sitam meri terima kasih ngagai komiti pengatur nyengkaum ari Kaban Komiti Besai Debak Fest, Marvelous Team Management, gerempung nembiak enggau NGO.
 
“Kerejasama rat ari semua raban ngemujur Debak Fest 2024,” ku iya maya ngulu pengawa bejadi enggau nangguhka pengerami nya.
 
Debak Fest 2024 mandangka bemacham aktiviti narit ati baka Pekit Pangka Tradisional, Bola Sepak Veteran, Fashion Show, Badminton enggau Futsal Piala Datuk Razi.
Aktiviti tu dipasuk bemacham organisasyen baka Kelab Futsal Frenz Ft, Palan Aktiviti Orang Tuai Debak, enggau Gerempung Indai Tunggal Sarawak.
Festival tu mega dipasuk 38 vendor ti nyendiaka bemacham pemakai enggau ai irup viral ti matak bala pengusung. -EDISI UKAS