SIMUNJAN: Projek ngaga baru dua jematan tebelian di Kampung Sabun/Sedilo udah mujur tembu penuh lalu diatu dibuka ngambi ulih ditengah peranak dia.
 
Jematan nya nambahka aksesibiliti sereta meri pemaik ngagai peranak lokal nuju jalai kebun ngagai jalai besai.
 
Kededua jematan nya sepanjai 21 meter enggau pemesai 1.8 meter.
 
Kaban Kunsil Nengeri (ADUN) Simunjan, Awla Dris madah ke projek nya sebagi ari inisiatif Perintah Sarawak nyendiaka infrastruktur bekualiti ngagai peranak menua pesisir.
 
“Jematan tu ukai semina nyendiaka penyambung tang mega ngerandang peluang ekonomi baru kelebih agi dalam akses pemansut asil betanam betupi,” ku iya.
 
Awla madah munyi nya maya ngemata pengawa nyerahka taba projek tembu ari kunteriktor ti bejalaika tanggungpengawa ngagai Tuai Raban Bansa Kampung Sabun/Sedilo, Yahabi Hamdan kena Hari Dua.
 
Projek ngaga kededua jematan tu belabuh dipejalai kena 6 September 2024 nyentuk 4 Januari 2025 ti beungkus RM89,990 nengah agih belanja Program Transfomasyen Menua Pesisir (RTP) Taun 2023.
 
Awla mega meri terima kasih ngagai raban kunteriktor laban mujur nembuka projek nya tumu agi ari taga asal.
 
Tuai Raban Bansa, Yahabi Hamdan nerima manah pengawa ngaga jematan tu lalu iya ngarika peranak genturung pendiau beterima kasih ngagai perintah enggau ADUN Simunjan laban udah meri perati.
 
Sama datai, Bala Penulung Injinir Opis Parit enggau Entali Ai (DID) Bagi Menua Samarahan, Christalvin Unting Cherry, Muadzam Alhaq Kuzbari enggau Arief Badiozaman Sapian. -EDISI UKAS