MIRI: Pemansang sektor dagang temuai di Miri udah ngemeratka pemesai guna pengangkut sungai enggau tasik seraya patut beratka sukut pengelikun.
 
Dikena nangkup peminta nya, Opis Menteri Pengangkut Sarawak nengah Unit Pengangkut Sungai enggau Tasik, nengah kerejasama Kaunsil Sungai Sarawak udah ngatur Riverine Transport Safety Workshop di Hotel Pullman Miri.
 
Menteri Pengangkut Sarawak, Dato Sri Lee Kim Shin nyemetak madah ke Miri nya sebuah mengeri ti agi bepanggai ngagai sungai nyadi pelasar beguna ungkup penyambung enggau aktiviti ekonomi baka industri, kapal enggau berikan.
 
“Nyadi mengeri ti aktif dalam industri kapal enggau ngena sungai, sukut pengelikun penguna sungai meseti nentuka nadai penusah enda disadang nyadi,” ku iya maya bejaku di bengkel nya bela diatur enggau River Cleanliness Campaign kena Hari Satu.
 
Ku iya, kimpin nya dikena nambah penemu enggau pengelandik bekaul atur ngenyit ba perau tauka bot.
 
“Inisiatif tu dipejalai ungkup penguna sungai di Sarawak serimbai genap taun kelima penumbuh Opis Pengangkut Sarawak,” terang iya.
 
Sama datai ba program iya nya Sapit Menteri Pengangkut (Sungai enggau Tasik) Sarawak, Dato Henry Harry Jinep; Pemangku Sekretari Mendam Opis Menteri Pengangkut Sarawak, Selamat Yanjah; enggau Pemangku Sapit Residen Miri, Ashard Samshu.-EDISI UKAS