KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg meri sukung tegut pengawa bekena ke teknologi Model Penerang Bengunan (BIM) dalam sektor berumah.
 
Ku iya, BIM ngena teknologi 3D ti ngasuh simulasyen ngaga bengunan ngena data ti chukup silik.
 
“Pengawa chukup silik enggau sukat, bansa ramu, tating pemerat enggau mayuh ke bukai. Semua tu disimpan dalam siti pantar data, ngasuh bengunan meruan agi ngena kereban ti bisi kualiti,” ku iya lebuh bejaku ba Pengerami Makai Lemai JKR Sarawak 2024 ditu, kena Hari Satu.
 
Berebak enggau nya, Datuk Patinggi Abang Zohari mega merambu ngena kereban inovatif ba pengawa berumah, nyengkaum dinding ti ulih nyadi panel solar.
 
“Minggu nyin tadi, bisi perambu ngaga bengunan perintah. Aku merambu sida ngaga simulasyen kereban, nyengkaum dinding ti ngena panel solar lempung ti dipeda baka dinding ke bukai.
 
“Tu ulih ngelimat kuasa enggau ngaga kuasa kediri empu,” ku iya.
 
Premier Sarawak mega nyemetak madah ke pengelebih BIM dalam ngelanggur rumah ti ngelimat kuasa nengah kereban enggau langkar ti genap.
 
Ba pengerami ke sama, iya mega udah ngemata pengawa besilih Sempekat Pemereti Ati (MoU) entara Opis Kereja Raya (JKR) Sarawak enggau Kaunsil Ekonomi Digital Sarawak (SDEC), enggau tuju ngenegapka pengawa begulai ba pemansang digital di nengeri tu.
 
Sama datai, Sapit Premier Sarawak Datuk Amar Douglas Uggah Embas, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sapit Menteri Infrastruktur enggau Pemansang Penyangkai Kapal Sarawak, Datuk Ir. Aidel Lariwoo, Sekretari Mendam (MIPD), Datu Chiew Chee Yau, Direktor JKR Sarawak, Ir. Dr. Cassidy Morris enggau temuai dipebasa ke bukai.-EDISI UKAS