KUCHING: Opis Menteri Infrastruktur enggau Pemansang Penyangkai Kapal Sarawak (MIPD) enggau Opis Kereja Raya (JKR) Sarawak patut besaup mansik kebuah projek laun tembu tauka bepenanggul.

Sapit Premier Sarawak Datuk Datuk Amar Douglas Uggah Embas madah, bisi empat iti projek dIkemadu lalu 11 iti projek laun.

Ari semua projek nya, ku iya, dua iti projek dipelanja perintah nengeri.

"Nyangka kitai patut ngadu beberapa bengkah pengawa baka netapka atur ba projek laun.

"Ba projek ke tembu dalam kandang dua taun, timpuh ke diberi iya nya 60 hari lalu enti ngelui ari nya dipadahka bepenanggul.

"Lalu projek ke digaga lebih dua taun, diletak 100 hari sebedau kitai nentuka kebuah penanggul nyadi.

"Ba aku timpuh tu kelalu lama," ku iya madah maya bejadika Hari JKR BIM Sarawak 2024 ditu, Hari Satu.

Iya mega minta JKR semampai nyikap diri nembuka projek nitih timpuh ke udah diletak, nitih bajet sereta tikas pemanah ti patut.

Ku iya, Perintah Sarawak ngelempaika tanggungpengawa ngaga projek lebih RM1.3 bilion ngagai JKR ungkup taun 2025 iya nya nambah 64 peratus ari penyampau bajet 2024.

Berebak enggau nya, Datuk Amar Douglas Uggah ke mega Menteri MIPD muji pengawa JKR ngena Pemodelan Maklumat Bangunan (BIM) ngulihka data projek enggau penerang bekaul projek.

"BIM tu nyaup mutarka pengilap besai ti ukai semina ngenyadika belanja tang nentuka projek digaga enggau mujur sereta nitihka timpuh ke udah ditetap ba bajet," ku iya madah.

Bela datai maya nya Sapit Menteri MIPD MIPD Datuk Ir Aidel Lariwoo enggau Direktor JKR Ir Cassidy Morris. -EDISI UKAS