KUCHING: Pengawa Sarawak nagih pulai hak enda tau dikumbai amu, ku Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Iya nyemetak madah ke semua hak ditagih Sarawak belalauka undang-undang sereta konstitusyen ti diaku.
 
“Tu utai kebendar. Enti kitai amu, baka orang bukai ti deka ngambi hak kitai, sida ngumbai kitai amu.

“Tang kitai enda amu. Kebendar, utai ke betul tetap betul, lalu utai ke salah tetap salah. Konstitusyen kitai chukup terang, dalam Artikel 47, pewaris reta chukup terang dalam Konstitusyen Sarawak. Pekara ti sebaka mega dikena ba Konstitusyen Perintah Besai.
 
Iya nyebut jaku nya ba mua mayuh rambau Pengerami Apresiasyen Unit Pekara Pengarap Bukai (UNIFOR) di Kuching kena Hari Tiga.

Berebak enggau nya, Datuk Patinggi Abang Zohari mega madah ke Konstitusyen Sarawak enggau Perintah Besai patut seruran ditan.
 
“Nya kebuah aku madah ke Datuk Amar Douglas Uggah ke alai aku bediri ditu ngelindung Konstitusyen Sarawak enggau Konstitusyen Perintah Besai," ku iya.
 
Sama datai ba pengerami nya dua Sapit Premier Sarawak, Datuk Amar Douglas Uggah Embas enggau Datuk Amar Prof Dr Sim Kui Hian, Menteri Pengangkut Sarawak, Dato Sri Lee Kim Shin; sereta Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom.
 
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil, Sapit Menteri Infrastruktur enggau Pemansang Penyangkai Kapal Sarawak, Datuk Majang Renggi, Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting Chiew Yew, Sapit Seretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, Sapit Seretari Perintah Sarawak (Administrasyen) Datu Buckland Bangik, Sapit Seretari Perintah Sarawak (Operasyen), Datu Hii Chang Kee, Direktor UNIFOR, Dato Georgina Apphia Ngau sereta bala tuai opis ke bukai sama datai ngerichah pengerami malam nya.- EDISI UKAS