KUCHING: Ujian Pentaksiran Standard deka diatur Perintah Sarawak dikena berati tikas pemandai nembiak sekula di nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya ditengkebang ngambi ke nembiak ti kurang pemandai deka disaup nitihka pematut.

"Nya alai, pekara pelajar kitai Sarawak ngena chara bukai taja kitai bebayar (ngatur peresa nya) ketegal kitai bekerejasama enggau Universiti Cambridge.

"Tang Sarawak nadai penanggul mayar laban kitai ngira pengidup dudi hari anak Sarawak lebih agi bekaul ekonomi baru," ku iya madah.

Iya bejaku munyi nya maya Pengerami Nutup Aum Besai Parti Pesaka Bumiputera Bersatu (PBB) Pampang Gedong ditu, Hari Minggu.

Bela datai maya nya Sapit Menteri Infrastruktur enggau Pemansang Penyangkai Kapal
Sarawak Datuk Ir Aidel Lariwoo, Kaban Kunsil Nengeri (ADUN) Simunjan Awla Dris, Kaban Parlimen Batang Sadong Rodiyah Sapiee enggau Penyanding Penemu Opis Menteri Dagang Antarabansa, Industri enggau Pemeranak Puku Sarawak Dato Sri Naroden Majais.

Iya mega madah, Perintah Sarawak nadai penanggul nitihka atur tikas pelajar menua tu tang peresa ungkup nembiak sekula meseti dipejalai dikena berati tikas pelajar bala nembiak.

Empai lama tu tadi, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madahka Ujian Pentaksiran Standard deka berengkah diatur ari taun 2025 ungkup nembiak Primeri 6 lalu Pom Tiga deka berengkah ari taun 2028.

Dato Sri Roland mega madahka peresa nya semina ungkup tiga subjek aja iya nya Matematik, Sains enggau Jaku English.-EDISI UKAS