SERIAN: Pengeransing Perintah Sarawak pegai Premier sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngetanka hak menua tu begunaka sukung ari peranak Sarawak.

Sapit Premier Sarawak Datuk Amar Douglas Unggah Embas madah, ba tuju nya, raban Parti Pesaka Bumiputera Bersatu (PBB) ngembuan tanggung pengawa ti chukup besai ngulihka sukung ari rayat Sarawak.

“Tiap iku peranak menua Sarawak dipinta enda kakang ati meri sukung ngagai Datuk Patinggi Abang Zohari ba pengawa iya ngetanka hak kitai baka ti udah dibantaika iya maya aum Kunsil Nengeri (DUN) empai lama ti bekaul enggau hak menua Sarawak.

“Asil menua nyengkaum asil ari atas tanah Sarawak asal iya nya tanah Crown nengah Sekyen Tanah 1958, diempu Perintah Sarawak sepengudah Malaysia ditumbuhka kena Hari Malaysia ba taun 1963" ku iya.

Iya madah munyi nya maya bejaku ba aum PBB Pampang Balai Ringin ba Palan Konvensyen Serian (SCC) ditu, Hari Minggu.

Ku Datuk Amar Douglas Uggah, sukung ari rayat chukup beguna lebuh betatika isu ti balat dipetalat bekaul enggau hak Sarawak tajapan udah diterangka Premier Sarawak empu baka ke udah disempekat ari kelia.

Berebak enggau nya, iya ngarapka tiap iti pampang PBB nyadika pekara tu maya konvensyen parti ti deka datai kena Febuari taun baru ila.

"Kitai mesti mantaika sukung ari semua rayat ngagai Premier dikena nentuka hak nengeri kitai," ku iya nerang baru.

Kelimpah ari nya, Datuk Amar Doulas Uggah ngelalau tiap iti pampang parti nya semampai mandangka juluk ati enggau pengeransing dikena nyungkakka pemisi enggau tikas idup rayat. -EDISI UKAS