SRI AMAN: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi udah datai ngulu Pengerami Nutup Pesta Benak 2024 ditu, kena ke Hari Minggu tu tadi.

Penatai Tun Pehin Sri Dr Wan Junaidi enggau bini ngelai sukung seduai ngagai pengerami nya ke tebilang sereta dikemegah rayat Sarawak, lebih agi peranak Sri Aman.

Kelimpah ari nya, Tun Pehin Sri Dr Wan Junaidi ngena awak maya nya meda pangka pasang benak, ngerichah agi pengerami nya ti ngempung main asal, daya idup enggau pemanah rampa menua.

Berebak enggau nya, Tun Pehin Sri Dr Wan Junaidi meda pekit ke penudi lumba Regatta Benak Batang Lupar 2024.

Gela Raja Sungai pekit nya mai perais mata duit RM25,000 enggau trofi. 

Pengerami ke diatur berengkah 28 November nyentuk 1 Disember 2024 nya bela dirichah enggau mayuh macham program, palan bedaja kraf enggau bazaaria, ke pelasar ngangkatka agi menua Sri Aman nyadi palan ditapat bala temuai.

Sama bela datai maya nya, Menteri Industri Pemakai, Komiditi enggau Pemansang Kandang Menua Sarawak Dato Sri Dr Stephen Rundi Utom, Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis, Kaban Parlimen Sri Aman Dato Sri Doris Sophia Brodie, Kaban Kunsil Nengeri (ADUN) Bukit Begunan, Datuk Mong Dagang, Pemangku Residen Sitak Sri Aman, Mahra Salleh sereta temuai ke bukai. - EDISI UKAS