KUCHING: Perintah Sarawak bisi juluk beranakka puku penyampau RM100 bilion ungkup timpuh lima taun berengkah taun baru nyentuk 2030.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa beranakka puku nya deka dipejalai ba lima sektor besai ti deka nyungkak ekonomi Sarawak tumbuh ungkup timpuh panjai.

Ku iya, lima sektor nya iya nya pendigitalisasian ekonomi, pemansut kuasa beresi, pelajar, pematak beranakka puku luar enggau pemansang infrastruktur.

“Lebuh kitai udah bisi sistem pelajar ti tegap, bisi industri kilang, kuasa enggau ekonomi digital, udah nya pekara ti patut dikemansangka kitai iya nya infrastruktur strategik pemun ti deka matak orang luar datai ke Sarawak sekali ke temuai tauka orang dagang.

“Nya alai, baka ti udah disebut aku tadi, lima taun ti deka datai kitai deka meranakka puku RM100 bilion enggau siti ari pekara diperatika kitai ngambi ngaga padang bilun kitai empu,” terang iya.

Iya nerang pekara nya lebuh bejaku ba Pengawa Ngelanchar Strategi Pemansang Pengudah Covid-19 (PCDS) 2030: Lansa 2023 ti diatur di Wisma Bapa Malaysia ditu kena Hari Lima.

Datuk Patinggi Abang Zohari madah baru, pengawa beranakka puku dalam sektor kuasa deka nyelinting kuasa gadung ti ulih dikemaru laban dunya diatu majak belidar ngagai pengawa bekenaka kuasa tu.

Nerang silik agi, iya madah ke Agensi Kuasa Antarabansa (IEA) udah meragam rega makit hidrogen deka kusut sepenyampau 50 peratus manggai taun 2030.

“Tu pekara ti beguna endar laban enti sema rega hidrogen ba baruh rega makit, reti iya ungkus ngeluar mega deka murah agi chara relatif dibanding enggau ke bukai.

“Tu mih pekara dikedeka sektor, kitai ulih nyendiaka pekara tu lalu sektor peribit deka datai ke Sarawak ngambi nginjin produk sida enggau sekumbang pengawa nya, sida deka ngambi orang fawa lalu nya deka meri peluang kereja ditu,” terang iya baru.

Sama datai dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, bala Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Kabinet Sarawak, Sekretari Pekara Wang Sarawak Dato Sri Wan Lizozman Wan Omar, Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel, Sapit Sekretari Perintah Sarawak (Operasyen) Datu Hii Chang Kee, Sapit Sekretari Perintah Sarawak (Administrasyen) Datu Buckland Bangik, Penyanding Penemu di Opis Premier Sarawak Datuk Amar Jaul Samion sereta bala tuai opis perintah nengeri. - EDISI UKAS