Ngerapit Seraka Dikena Mutar Isu Global Nengah R&D
Disiarkan pada 06 Nov 2024
Sumber Berita: UKAS
KUCHING: Sarawak diatu benung majakka pengawa dikena ngerapit seraka bekaul isu global nengah pengawa pemansik enggau pemansang (R&D).
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara tu begunaka pengelandik dikena nentuka pengawa mutar ke dilangkar ukai semina inovatif tang mega meruan sereta ulih dikerembai.
Ku iya, pengawa nya tampak dipeda ari pengawa ke dikereja Kaunsil Pemansik enggau Pemansang Sarawak (SRDC) ke chakah ngatur kerejasama enggau institusyen akademik, bakih industri, perintah enggau organisasyen ukai perintah (NGO) ba tuju ngaga langkar kereja ti tegap dikena nentuka pengawa mansik pulai ke asil.
“Chunto ke nyemetak dipeda iya nya program meri vaksin ti dipunka Palan Penyakit Berampit Sarawak (SIDC).
“Nyadi siku ari raban Hab Vaksin UK SEA, program tu ulih mai teknologi enggau pengelandik ba pemansang vaksin ari United Kingdom ngagai SIDC lalu nempa pengulih menua tu sereta nyungkak pengulih kitai ba pengawa ngaga vaksin,” ku iya madah.
Iya madah munyi nya nengah teks ke dibacha Sapit Premier Sarawak Datuk Amar Profesor Dr Sim Kui Hian beserimbai Pengerami Bejadi Simposium Pemansik enggau Pemansang Sarawak Ke-2 ditu, Hari Tiga.
Kelimpah vaksin, Datuk Patinggi Abang Zohari bela bekunsika pengeransing Sarawak ba inovasyen kuasa ke ulih dikena baru enggau chara ngena pengeraja asal ke endang udah bisi dikena nyunkak pemansang meruan.
Nerang enggau nyemetak, iya madah pengawa tu begunaka R&D betandu dikena nentuka menua tu ulih ngasilka kuasa gadung.
“Siti ari penguji besai ba ekonomi hidrogen kitai iya ngurangka ungkus tang, aku dipadahka SRDC benung ngemeratka pengawa mansik enggau pemansang kuasa ulih dikena baru.
“Inisiatif tu ukai semina nyadi chara dikena ngurang ungkus tang mega pengeransing beambi ulih ari penemu enggau pengereja asal menua kitai,” ku iya madah baru.
Kelimpah ari nya, Datuk Amar Dr Sim ke mega Menteri Pengerai Mensia Mayuh, Pengawa Berumah enggau Perintah Menua Sarawak bisi ngemata pengawa besilih Sempekat Pemereti Ati (MoU) entara SIDC, Universiti Sheffield enggau Hilleman sereta Semikonduktor Reka Bentuk Mikroelektronik Sarawak (SMD) enggau Universiti Curtin Malaysia.
Sama bisi datai maya nya, Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn, Penyanding Penemu Opis Menteri Pelajar, Inovasyen enggau Pemansang Pengelandik Sarawak
(MEITD) Datuk Amar Michael Manyin, Sapit Menijar Besai SRDC Dr Ivan Yap Kok Seng sereta temuai dipebasa ke bukai. -EDISI UKAS
