Isu Negap Rega Barang & Servis Di Sabah, Sarawak & Labuan Dikerandau
Disiarkan pada 18 Sep 2024
Sumber Berita: UKAS
KOTA KINABALU: Sekeda isi enggau pemar bekaul negap rega barang enggau servis di Sabah, Sarawak enggau Wilayah Persekutuan Labuan udah dikerandau ba Aum Komiti Negap Rega ke diatur ditu, kena Hari Dua tu tadi.
Aum nya udah digulu Sapit Menteri Besai, Dato' Sri Fadillah Yusof ke mega Menteri Idar Kuasa enggau Transformasyen Ai, enggau Sapit Premier Sarawak, Datuk Amar Awang Tengah Ali Hassan.
Ku penerang media ari Opis Sapit Premier Sarawak, entara strategi besai dikerandau iya nya chara nyurangka kos logistik barang import enggau randau pasal pematut ngemansangka industri ngaga pemakai enggau kereban berumah dikena nangkup peminta domestik sereta makit eksport.
Kerejasama strategik entara Perintah Besai enggau Perintah Sarawak, Sabah sereta Labuan mega dikerandau, ke nyelinting inisiatif ngaga pemakai jelu tupi enda kelalu bepanggai ba produk import.
Nya alai, Komiti nya mega setuju ke pematut ngaul sektor peribit enggau komuniti nentuka pejalai program nya meruan ungkup pengelantang rayat.
Dulu ari nya, tungkup silik pasal strategik negap rega barang di Sarawak, Sabah enggau Labuan ke benung dipejalai Universiti Malaysia Sarawak enggau Universiti Malaysia Sabah disadang tembu ujung taun tu lalu deka dibantai ngambi diperundingka komiti.
Sama datai Menteri Dagang Dalam Menua enggau Kos Pengidup, Datuk Armizan Mohd Ali, sereta Menteri Pemansang Komuniti enggau Pengelantang Rayat Nengeri Sabah, Datuk James Ratib. -EDISI UKAS
