Pengerami Lumba SUK Se-Malaysia 2024: Datu Buckland Udah Nyua Papan Carom Ke Kelai
Disiarkan pada 18 Sep 2024
Sumber Berita: UKAS
KUCHING: Sapit Sekretari Perintah Sarawak (Pengatur Pengawa) ke mega Chef de Mission Kontinjen SUK Sarawak, Datu Buckland Bangik udah nyuaka papan carom sereta kereban sukung carom nyadi kelai ba opis iya di Wisma Bapa Malaysia ditu, kena Hari Dua tu tadi.
Pengawa nyuaka kereban nya dikena besikap napi Pengerami Lumba SUK Se-Malaysia Ke-9 2024 ke deka diatur ba Kuala Terengganu berengkah 14 nyentuk 20 Oktober tu ila.
Berebak enggau nya, Minijir Tim, Nazrie Sulaiman madah, enggau perengka sereta kereban ti chukup, dikearap ulih mantu neleba bala pemain sereta ngelanchar pengawa latih maya ngena papan carom nya di Terengganu ila.
Iya madah, pengeransing enggau semangat bala pemain sereta jurulatih patut dipuji laban udah meri kerejasama pemadu manah.
“Kami optimis misyen tu ulih dijapai bepelasarka pengawa nyikap diri enggau manah dikena nyikap tim ke deka bepekit sekali tu.
"Pengawa nyikap diri kitai dalam kandang berapa minggu tu udah mandangka asil ti positif lebih agi ari sukut eksposur lalu tu mega nyadi peransang dibai ba pekit ila lalu ngarapka kitai ulih nempa sejarah baru di Terengganu ila,” ku iya.-EDISI UKAS
