Premier Sarawak Lantang Ati, Pengawa Nyikap Nyambut Hari Sarawak Diatur Enggau Mujur
Posted on 10 Jul 2024
Source of News: UKAS
KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka diri berasai lantang ati senentang pengawa nyikap pengerami nyambut Hari Sarawak 2024 kenaka 24 Julai tu.
Chairan Komiti Besai Pengerami Hari Sarawak 2024 ke mega Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, pengawa nyikap pengerami nya digaga enggau silik ba tuju nentuka Hari Sarawak taun tu diintu enggau richah.
Kelimpah ari nya ku iya, Datuk Patinggi Abang Zohari disadang deka bejadika Petchem Methanol di Tanjung Kidurong, sehari nya mega.
Iya madahka pekara nya sepengudah nemuai basa ngagai Premier Sarawak di Wisma Bapa Malaysia, Petra Jaya, kena Hari Dua tu tadi.
Dato Sri Dr Stephen Rundi enggau Komiti Besai Pengerami Nyambut Hari Sarawak Taun 2024 bela deka ngatur penemuai basa ngagai Yang di-Pertua Nengeri Sarawak Tun Pehin Sri Dr Wan Junaidi Tuanku Jaafar di Astana Sarawak, kena Hari Tiga.
Nangkan nya, Dato Sri Dr Stephen Rundi madah, Bintulu udah dipilih nyadi tuai rumah pengerami nyambut Hari Sarawak 2024 bepun ari pemansang ke majak nyadi ba sitak nya.
Sekeda ari program ke deka diatur beserimbai pengerami nya ila baka Pengerami Selamat ke diatur pengarap bukai kenaka 20 Julai enggau Pengerami ke sebaka di Masjid Assyakirin Bintulu kena 21 Julai.
Tu ditangkan ‘Fun Ride’ di Dewan Suarah Bintulu enggau townhall di Universiti Putra Malaysia Kampus Bintulu diatur kena 22 Julai ila.
Batang pengerami iya nya program Begempuru Hari Sarawak 2024 ke diatur ba Padang Bilun Lama pukul 8 lemai, 22 Julai.
Mensia mayuh ke datai maya nya ila deka diperindang artis tebilang menu tu baka Bob Yusuf, Melissa Francis enggau Dayang Nurfaizah. -EDISI UKAS
