Dion Mai Nama Sarawak ‘Terebai’ Tinggi Di AS, Bulih Dua Midul Emas Ba WCOPA 2024
Disiarkan pada 08 Jul 2024
Sumber Berita: UKAS
KUCHING: Dion Das Louis tauka tampak agi digelar ‘Little Borneo Birdie’ nempa sejarah iya empu lalu mai nama Sarawak ‘terebai’ tinggi ba panggau dunya lebuh bulih dua midul emas ba Pekit Seni Pemerindang Dunya Ke-27 (WCOPA 2024) di Long Beach, Califonia, Amerika Syarikat.
Lebih manis, nembiak ti landik betanda beumur lapan taun nya bulih dua midul emas ba ‘Tarian Etnik’ enggau ‘Photo Shoot Model’ ungkup kategori Junior.
Pengawa mandangka main asal kontemporari Ngajat ti besuluka jaku ‘Little Sarawak Birds’ ditempa ari Burung Ruai enggau Burung Kenyalang ti ngayanka Sarawak.
Berebak enggau nya, Dion mega bulih midul perak ungkup kategori ‘Model Formal’ enggau ‘Model Casual’ ari kategori Junior.
Dion enggau 11 iku penyereta bukai ari Malaysia mega bulih gelar Division Winner ba WCOPA ti disemaka baka ‘Olimpik’ ba dunya seni pemerindang.
WCOPA 2024 diatur belabuh ari 1 ngagai 5 Julai tu tadi.
Sebedau tu, Dion dipilih enggau WCOPA 2024 pengudah bulih midul emas ba Pekit Seni Pemerindang Malaysia 2024 di Kuala Lumpur kena 27 Januari tu tadi.-EDISI UKAS
