SHANGHAI: Sarawak mantai strategi penerebai bilun pintar ba Forum Penerebai Bilun Awam Antarabansa 2025 ti berambaika jaku Negap Kaul Global enggau Ngemeran Inovasyen ba Penerebai Bilun.

Menteri Pengangkut Sarawak, Dato Sri Lee Kim Shin madah, pengawa ke digaga Sarawak diatu beguna bendar dikena ngadu transformasyen sektor penerebai bilun ari kaul serantau nyadi langkar kereja antarabansa.

"Nengah inovasyen enggau kerejasama, kami deka mai Sarawak nempa kaul enggau penerebai bilun global lalu numbuh mayuh agi pengawa puang ungkup rayat kami," ku iya madah.

Forum ke diatur ba Universiti Shanghai Jiao Tong nya digulu 300 deligit ari macham bengkah menua.

Sekeda ari pengelicha maya nya nyengkaum pengari ari ICAO, IATA, universiti tebilang sereta pemesai industri penerebai bilun antarabansa.

Program nya ngemeratka pemansang dudi hari industri penerebai bilun global bepelasar kaul, transformasyen pintar teknologi 'artificial intelligence', kuasa gadung enggau standardisasi infrastruktur.

Dato Sri Lee madah, Sarawak ngerandang awak kerejasama enggau opis bekuasa penerebai bilun antarabansa, institusyen pemansik enggau bakih industri ba tuju nyerungkai pengulih dudi hari mobiliti meruan enggau pintar.

Kelimpah batang forum, dua sub-forum bela diatur dikena berandauka inovasyen teknologi penerebai bilun, sistem pengatur pintar enggau chara pemansang meruan ba perspektif global. -EDISI UKAS