KUCHING: Sarawak Regatta 2025 udah berengkah diatur ba Kuching Waterfront, ngelai belabuh pekit lumba ai tebilang menua tu.

Pekit dipunka enggau kategori Perau Bidar 30 Pengayuh Lelaki (Tebuka) ngerebut Midul Antarabansa Borneo, ditangkan lumba Perau Bidar 15 Pengayuh Lelaki (Tebuka) ke bela matak penyereta ari menua tu enggau menua bukai.

Batang program sehari tu iya nya kategori Perau Bidar 30 Pengayuh Lelaki (Menua) ke ngerebut Midul Tuai Megai Menua Yang di-Pertua Negeri Sarawak (Raja Sungai), anugerah pemadu besai ba sejarah Regatta.

Kelimpah ari nya, lumba Perau Bidar 15 Pengayuh Lelaki (Menua) ungkup Midul Penyerakup enggau Perau Bidar 25 Pengayuh Lelaki (Menua) ungkup Midul Petros.

Pengerami ngatur Sarawak Regatta 2025 ukai semina pekit lumba ai, tang mega kelai pengelantang enggau penyerakup pupu raban bansa di Sarawak.

Main asal tu terus nyadi kelai pengering semangat rayat nengeri tu kelimpah nyadi batang pematak dagang temuai menua. -EDISI UKAS