KUCHING:Kebawah Duli Paduka Baginda (KDPB) Sultan Pahang Al-Sultan Abdullah Ri’ayatuddin Al-Mustafa Billah Shah Ibni Al-Marhum Sultan Haji Ahmad Shah Al-Musta’in Billah sereta KDYMM Tengku Ampuan Pahang Tunku Azizah Aminah Maimunah Iskandariah Binti Almarhum Sultan Iskandar Al-Haj mujur datai di Terminal Orang Kenamaan, Padang Bilun Antarabansa Kuching (LTAK),Hari Lima.
Seduai Seri Paduka Baginda datai pukul 12.10 tengah hari diambat Yang di-Pertua Negeri Sarawak Tun Pehin Sri Dr Wan Junaidi Tuanku Jaafar enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Bela ngambat penatai seduai Baginda iya nya Sapit Premier Sarawak Datuk Amar Prof. Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki, Sapit Menteri Pemansang Indu, Nembiak Mit enggau Pengelantang Komuniti Sarawak Datuk Mohammad Razi Sitam sereta pemesai ke bukai.
Seduai baginda ngepun penemuai gawa empat hari, berengkah sehari tu nyentuk Hari Satu tu ila, kepenudi seduai datai kitu, maya program Kembara Borneo 2023 lebuh Baginda Sultan nyadi Seri Paduka Baginda Yang di-Pertuan Agong ke-16.
Sepemanjai penemuai tu, seduai Baginda disadang deka ngulu macham program sereta budaya begulai enggau rayat nengeri tu.
Lemai tu, seduai Baginda dipelaba ngulu Pengerami Lemai Masa Sarawak–Pahang ke diatur di Kompleks Kunsil Nengeri Sarawak.
Pagila, seduai Baginda deka nemuai ngagai Kampung Kanchong Baru, Gedong meda pengawa nenun di Seri Gedong Songket.
Al-Sultan Abdullah disadang nemuai ngagai Palan Jelu Siga Semenggoh, lalu Tengku Ampuan Pahang nemuai ngagai Kompleks Songket Sri Kenyalang ba Jail Puncak Borneo.
Nibak lemai, Seduai Seri Paduka Baginda deka ngagai Waterfront Kuching ngulu Program Bejadi Pengerami Gendang Sarawak 2025, ke alai seduai deka ngemata Musical Fountain enggau bungai api.
Kena pagi Hari Minggu, Sultan Pahang enggau Tengku Ampuan Pahang disadang nemuai ke Kampung Budaya Sarawak, sebedau sekali agi ke Pengerami Nangguh Regatta Sarawak 2025 sereta Pengerami Kraf Borneo Sarawak 2025 muak ke lemai.
Seduai Baginda deka pulai ke Pahang Darul Makmur kena Hari Satu nengah LTAK nuju Pangkalan Udara Tentera Udara Diraja Malaysia (TUDM) Kuantan.-EDISI UKAS
Pemberita: Ahmad Daniel Faiz
Gambar: Hazrin Sunaini
