MIRI: 3rd International Conference on Educational Research and Innovation (iCERI2025) ti berambai jaku “Educational Creativity and Innovation: From Global Research to Local Impact” udah belabuh Hari Dua tu.

Program nya dipenyadi Sapit Menteri Pelajar, Inovasyen enggau Pemansang Penau II (Pemansang Penau), Datuk Francis Harden Hollis ke datai ngari Menteri Pelajar, Inovasyen enggau Pemansang Penau Sarawak (MEITD), Dato Sri Roland Sagah Wee Inn.

Program tu diatur Palan Pematih Pengajar Kampus Sarawak (IPGKS) enggau kerejasama Opis Menteri Pelajar, Inovasyen enggau Pemansang Penau (MEITD) sereta disaup Business Events Sarawak (BES) enggau Hotel Meritz berengkah ari 21 ngagai 23 Oktober 2025.

Program nya ngempuru lebih 1,400 penyereta menua tu enggau ari menua bukai, nyengkaum 119 bejuraika keretas kereja, 192 tim inovasyen enggau 32 tim robotik, ngaul nembiak, pengajar, pemansik sereta penengkebang polisi ari macham penatai.

Ba teks jaku ke dibacha Datuk Francis Harden, Dato Sri Roland Sagah madah, tanggungpengawa iCERI nyadi pelasar dinamik ti ngempung teori enggau pelajar ke bendar sereta nempa asil pansik global ulih dikeamatka ba renggat menua.

Iya bela bekunsi inisiatif Program Nyungkak Pelajar Sarawak (SEEP) ti merati sistem pelajar inklusif sereta besemekih.

Sebagi ari pekara ti diperati iya nya nyungkak enrolmen nembiak ba bidang STEM ngagai 60 peratus manggai 2030 sereta ngerembai Dual Language Programme Sarawak (DLP) ngagai renggat sekula sekondari berengkah taun 2026, dikena negap landik sains, matematik enggau landik bejaku Inggeris.

Kelimpah ari nya, iya ngelalau ngambi budaya inovasyen dikemeran kenyau ari ba sekula lalu meri awak ngagai nembiak ngayanka penemu sereta projek sida.

Konferens tiga hari nya ngempuru pengelicha antarabansa ari United Kingdom, Thailand, Vietnam, Filipina enggau Malaysia ti deka berandauka macham pekara baka trend pelajar global, pedagogi inovatif enggau integrasyen teknologi ba pelajar.-EDISI UKAS