KOTA SAMARAHAN: Pengawa Ngatur Gerempung Orang Bumai Nengeri Sarawak (PPNS) Agriculture Mini Expo 2025 diperati nyadi sebagi ari pengawa ti engkeman negap sektor agro-pemakai Sarawak sereta nerenak pengerindu nembiak biak numbuh betanam betupi moden enggau ngena teknologi.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, sektor betanam betupi enggau komoditi entara pugu pemansang menua pesisir sereta meri asil besai ba ekonomi nengeri.

“Sarawak ngembuan tanah ti besai, kaya pengereja asal tenggau penau ke majak ngerembai ba pengawa betanam betupi moden sereta komersial.

“Mini expo tu mandangka pemesai reti ngagai bala orang ke bekebun senentang teknologi baru, chara betanam betupi pintar enggau akses makit ti besai agi,” ku iya madah maya bejadika expo nya ke diatur ba Begunan PPNS, Jalan Muttaqin, ditu, Hari Lima.

Iya bela meri terima kasih ngagai PPNS ti nyadi pengatur ke pemujur sida ngempuru bala mayuh, nyengkaum agensi perintah, orang dagang, orang bekebun enggau peranak menua ba ngangkat sektor agro-pemakai.

Sepemanjai expo tu, entara program ti bisi nyengkaum, pemandang produk betanam betupi menua, demonstrasyen teknologi betanam betupi moden, sesi bekunsi penemu begulai enggau orang dagang ke udah nyulut sereta pengawa bejual produk agro-pemakai menua.

“Aku andal expo baka tu ulih matak pengerindu nembiak biak nyadi agropreneur, seriris enggau pengingin perintah nengeri ke deka ngadaka mayuh agi orang dagang bekebun ke ulih besemekih enggau inovatif,” ku iya madah baru.

Nambah ke jaku iya, iya madah PPNS ngesan tanggungpengawa besai nyadi jematan entara orang bekebun, orang dagang enggau agensi perintah ba ngemujurka macham inisiatif pemansang sektor betanam betupi nengeri.

Nya alai, ku iya, opis menteri iya deka terus nyukung inisiatif pemansang nengah polisi, latih, bantu enggau nyendia infrastruktur betanam betupi ti meruan sereta beretan.

Iya bela nesau semua ke datai ngambi ke beambi ulih ba expo tu nyadi pelasar alai belajar, bekunsi penemu enggau nyintal kerejasama nempa sektor betanam betupi Sarawak nyadi dinamik agi sereta ulih mansang.

Sama datai, Sapit Menteri Industri Pemakai, Komoditi enggau Pemansang Kandang Menua (Industri Pemakai) ke mega Chairman PPNS Datuk Dr Abdul Rahman Ismail, Sapit Menteri Komoditi enggau Pemansang Kandang Menua Datuk Martin Ben, Residen Bagi Menua Samarahan Mohamad Irwan Bahari Bujang, Pegawai Pelilih Samarahan Ahmad Abdul Razak, Direktor Betanam Betupi Sarawak Dominic Chunggat sereta Menijar Besai PPNS Gom Raway. -EDISI UKAS