DEBAK: Sepenyampau 42 peranak ari Kampung Babu Hilir udah ngulu Kus Hidroponik Siri 2: In-Situ-Diseminasi Teknologi Betanam Chara Hidroponik ti diatur di Dewan Millennia, Debak kena Hari Tiga.
 
Kus nya diatur Opis Betanam Betupi Bagi Menua Betong enggau kerejasama Komiti Pemansang enggau Pengelikun Genturung Pendiau (JKKK) Kampung Babu Hilir.
 
Tuju program nya meri penemu pasal teknologi betanam moden ngena chara hidroponik ngagai komuniti menua pesisir, dikena nambah penyampau asil utai tanam chara meruan enggau manah ke rampa menua.
 
Sekumbang kus nya, bala penyereta diajar penemu teori enggau latih betanam ngena chara
hidroponik, ngatur nutrien, milih bansa utai tanam ti engkeman enggau sukut nyual enggau makit asil betanam.
 
Tuai Kampung Babu Hilir, Abg Mohd Tawfik Abg Bujang madah ke diri berasai lantang ati meda pengeransing bala penyereta lebih agi raban nembiak enggau indu gawa ngintu ruang bilik.
 
“Kitai ulih meda pengeran peranak ngiri penemu ba kus tu. Tu mih pengawa ti chukup manah nuju pemansang betanam komuniti.
 
“Aku ngarap ke penemu diiri tu deka ngepunka projek tanaman hidroponik mit dulu ba genturung pendiau tu, lalu ulih meri penatai pemisi tambah ngagai sida sebilik,” ku iya.
 
Iya mega ngarap ke kus baka nya dikerembai ngagai genturung pendiau bukai dikena nambahka pengelantang betanam moden ngagai komuniti menua pesisir.
 
Kus nya mega setipak enggau juluk perintah ba jamin bekal pemakai menua enggau narak pengawa betanam mengeri enggau teknologi gadung.
 
Pengawa nutup kus dipenyadika Temenggong Piee Alwi disempulang Tuai Kampung Babu Hilir, Debak.-EDISI UKAS