MIRI: Kaunsil Dagang Temuai Sarawak (STB) terus mandangka pengeransing sida ngintu rampa menua nengah pengawa nanam 2,500 paung kayu spesies asal di Piasau Nature Reserve, ditu, kena Hari Lima.
Program nya sebagi ari inisiatif ecoGreenPlanet ti dilanchar kenyau ari 2023 enggau juluk nanam 10,000 pun kayu manggai 2027.
Ku Chairman STB ti mega Kaban Kunsil Nengeri (ADUN) Telang Usan Dato Dennis Ngau, pengawa sekali tu ngujungka penyampau semua pun kayu ditanam naka diatu manggai 6,200 pun kayu tauka 62 peratus ari juluk.
“Ba taun 2023, inisiatif ecoGreenPlanet udah netapka juluk ti berani tang realistik — nanam 10,000 pun kayu manggai 2027 nyadi sebagi ari pengawa ngintu rampa menua enggau nyemela bekau karbon ari aktiviti dagang temuai.
“Ari 2,500 paung kayu spesies asal ditanam sehari tu, kitai udah nyapai 62 peratus ari juluk nya.
“Tetiap paung kayu ti ditanam, ari Samunsam Wildlife Sanctuary, Bukit Lima Nature Reserve, nyentuk ke Miri, mandangka pengandal kami ke alai dagang temuai meseti nyadi kuasa pemaik,” ku iya lebuh bejaku ba pengawa bejadi program nya.
Dato Dennis mega madah, pengawa STB ukai semina nanam pun kayu aja, tang mega nyerangkung chara holistik nengah bemacham program meruan ti dipejalai di baruh Festival Kampung Ujan Sedunya 2025.
Ku iya, nya nyengkaum sistem bas kurang karbon, stesyen pengechas solar, ngaga lanyard ari kubal udah dikena ti dikereja indai tunggal, ngasilka biodiesel ari minyak makai udah dikena sereta kerejasama enggau PATA matau karbon.
“Semua inisiatif tu mandangka pengawa kami seraris enggau Strategi Pemansang Pengudah COVID-19 (PCDS) 2030, Juluk Pemansang Meruan (SDG), sereta pangku pengawa kami nyadi pengemudi dagang temuai bisi tanggungpengawa enggau ngeleda klimet ba rantau tu,” ku iya.
Inisiatif nya mega disukung Sarawak Forestry Corporation (SFC), Majlis Bandaraya Miri (MCC), Tourism Malaysia, raban melanja sereta komuniti dia.
Nambah ke nya, program nya seraris enggau juluk PCDS 2030 enggau Juluk Pemansang Meruan (SDG), lebih agi SDG 12 (Bekena enggau Ngeluar Bisi Tanggungpengawa), SDG 13 (Mutar Ubah Klimet) enggau SDG 17 (Bekunsi Juluk).
Pengawa sehari nya mega digulu Datuk Bandar Bandaraya Miri ti nyadi ADUN Pujut Adam Yii Siew Yang, Menijar Kandang Menua Miri, Sarawak Forestry Corporation Louis Velda Dominic Salon, Direktor Kandang Menua, Tourism Malaysia Sarawak Rubiah Tul'adwiyah Md. Yusof, sereta Pemangku Tuai Pegawai Eksekutif, Sarawak Tourism Board Maurice Vincent Balang.
Entara isi program nyengkaum licha nanam ari renjer taman, aktiviti nanam paung kayu dikereja bala penyereta, sesyen begambar enggau bejalai ngelantang ati ba Piasau Nature Reserve, sebedau semua sida dibai serumpu merarau ba Piasau Boat Club.-EDISI UKAS
