MIRI: Sarawak deka ditapat komuniti saintifik antarabansa lebuh nyadi tuai rumah The 17th International Conference on Materials Processing and Characterisation (ICMPC 2025) ti ditaga ari 27 nyentuk 29 November tu di Hotel Imperial, Miri.
 
Pekara nya dibantai ba siti aum media ti diatur di Universiti Curtin Malaysia kena Hari Lima ti mega digulu Datuk Bandar Bandaraya Miri ti nyadi Kaban Kunsil Nengeri (ADUN) Pujut, Adam Yii Siew Yang.
 
Ku Adam Yii, pengawa ngatur ICMPC 2025 nya seriris enggau Strategi Pemansang Pengudah COVID-19 (PCDS) 2030 lebih agi ba sukut pemansang penau enggau modal mensia menyana sereta negapka ekosistem inovasyen enggau teknologi di nengeri tu.
 
“Konferen tu mega ngerandang peluang ngagai bala nembiak enggau pemansik industri lokal berandau betunga mua enggau bala pakar antarabansa ba pekara nginjin enggau ngaga penteba kereban,” ku iya.
 
Konferen tikas antarabansa nya diatur Universiti Curtin Malaysia enggau kerejasama Gokaraju Rangaraju Institute of Engineering and Technology (GRIET), India, sereta nerima sukung tegut Perintah Sarawak nengah Opis Menteri Pelajar, Inovasyen enggau Pemansang Penau (MEITD) enggau Business Events Sarawak (BESarawak).
 
ICMPC 2025 dikeandal ulih ngentapka agi penuduk Sarawak nyadi hab penyulut penemu enggau teknologi di rantau ini sereta gawa ke pemujur juluk pemansang nengeri manggai 2030.
 
Bela datai, Pro Mandal Canselor ti nyadi Presiden enggau Tuai Pegawai Eksekutif Universiti Curtin Malaysia, Profesor Vincent Lee Chiang Chen; Tuai Pegawai Eksekutif Business Events Sarawak, Amelia Roziman, Chairman Pengatur ICMPC 2025, Profesor Sujan Debnath; Sapit Chairman, Profesor Swadesh Kumar Singh sereta pengari pengatur begulai ari Universiti Teknologi Brunei, Dr Fadzliwati Mohiddin. -EDISI UKAS