KUCHING: Sarawak Microelectronic Design (SMD) Semiconductor, kompeni semikonduktor enggi perintah nengeri deka ngatur Sarawak Semiconductor Syndication Session kena 21 Julai tu di Kuching.
Sesyen nya deka ngempuruka 40 pemekuh nyengkaum opis menteri sereta agensi Perintah Besai enggau nengeri, institusyen pelajar enggau latih, sereta pemekuh industri semikonduktor enggau tuju ngerumban transformasyen Sarawak ba sektor teknologi moden, seriris enggau visyen ngangkatka nengeri tu nyadi Palan Urat Silikon Asia.
Program nya berindik ari pengawa ngelanchar Langkar Strategik Semikonduktor Sarawak enggau Pelin Tunga Kuing Semikonduktor Sarawak 2030: Beyond Moore’s Law ti udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di CSA Catapult, Wales kena 29 April nyin tadi.
Sesyen nya diatur enggau kerejasama Opis Menteri Pelajar, Inovasyen enggau Pemansang Penau (MEITD) sereta Opis Menteri Dagang Antarabansa, Industri enggau Meranak Puku (MINTRED) enggau tuju nentuka visyen strategik, dibantai ngagai pengawa ti nyengala, nyata enggau ulih disukat, enggau meri perati ngagai rebak dudi sereta pengetan ekonomi Sarawak.
Tuai Pegawai Eksekutif (CEO) SMD, Shariman Jamil deka ngemudi ke sesyen nya lalu deka mantaika pelin tunga kuing semikonduktor Sarawak ti ngundan 10 pengawa strategik dikena numbuh ekosistem semikonduktor ti genap manggai taun 2030.
Bela matak perati iya nya pekara ti deka dikunsi Collaborative Research in Engineering, Science and Technology (CREST) senentang Strategi Semikonduktor Menua (NSS) sereta Tuai Pegawai Pekara Wang SMD, Shahril Anas ti deka bekunsi pasal belanja sektor nya nyengkaul puku nyerungkai.
“Chara 'bottom-up' ti udah lama dikemeran SMD dikena nentuka langkar ti digaga nya endang mandangka peminta industri ba renggat lokal sereta global sereta ngerandang peluang ungkup rayat Sarawak.
"Sesyen syndication tu deka ngamatka visyen nya, ngerumban pejalai Sarawak nyadi Palan Urat Silikon Asia.
“Tu ukai semina juluk aja tang benung nyadi, lalu kami deka enggau ngelaluka semua raban ngaul diri ngemujurka juluk tu,” ku iya ba siti penerang media kena Hari Lima.
Sekumbang sesyen nya, Shariman mega deka mantaika peluang ba sektor nengkebang chip, pansik enggau pemansang (R&D) nyengkaum 'advanced packaging' iya nya pengawa ti ulih meri peluang kereja begaji besai enggau meransang pemansang timpuh panjai ba Sarawak.
Entara raban ti deka bekunsi penemu ba bengkel nya baka Sean Redmond ari Silicon Catalyst UK bekaul landskap semikonduktor UK, kelimpah pengari ari Opis Sains, Inovasyen enggau Teknologi UK (DSIT).
Bala penyereta disadang meri sadang penemu strategi ti seriris enggau juluk Sarawak ba renggat nasional enggau antarabansa.
"Asil enggau sadang penemu strategik ari sesyen nya deka disua ngagai Premier Sarawak lalu negapka 'blueprint' Langkar Strategik Semikonduktor Sarawak ke udah bisi," ku iya.
Nya alai, Shariman ngarap ke sesyen sindikasi nya ukai semina siti gempuru aja tang pengawa beguna ti negapka penau lokal rebak baru, ngentapka pangku pengawa Sarawak nyadi kuasa semikonduktor mampan enggau nyungkak pengawa nyendiaka peluang kereja begaji besai ungkup ekonomi timpuh panjai ti tegap -EDISI UKAS
