KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah nerima penemuai basa ari Balai Orang Dagang Bumiputera Sarawak (DUBS) di Wisma Bapa Malaysia, Hari Lima.

Deligit DUBS ti betuai ke Presiden iya, Datu Abang Halmi Ikhwan enggau Sapit Presiden Cr Halim Mohamad, Mandal Presiden Roselyn Long Lah enggau Dr Sulaiman Sahari sereta kaban kaunsil eksekutif supreme DUBS.

Nitih ku Datu Abang Halmi, tuju penemuai deligit DUBS nya dikena meri penerang senentang pemansang ngatur projek sereta kereban ke dipelanja Perintah Sarawak.

"Naka tu, kami udah madah ngagai iya gaya pejalai pemadu baru senentang projek nya.

"Premier Sarawak endang sigi siru ke komuniti orang dagang bumiputera sereta selalu nyaup kami ba macham pekara,” ku iya.

Ku iya nerang, perintah udah mayuh meri bantu belanja ngagai DUBS, lebih agi ba bejalaika program latih ngagai orang dagang Bumiputera.

Nambah ke jaku iya, iya madah, rayat ke deka nempa dalam bidang dagang bela dibantu nengah pemeri bantu belanja ari perintah.

Kelimpah ari nya, tuju penemuai nya mega dikena madah pemujur ngaga begunan baru DUBS di Jalai Ong Tiang Swee ngagai Premier Sarawak. -EDISI UKAS