KUCHING: Program ‘Nembiak Bepungkal Sekula’ ke deka diatur nyadi sebagi ari inisiatif tumu Perintah Sarawak nentuka pejalai Skim Pelajar Tinggi Enda Bebayar Sarawak (FTES) ba taun 2026 endang amat meri pemaik ngagai nembiak menua pesisir, lebih agi ba pengawa ngenegap pengelandik ba subjek teras baka Matematik, Sains enggau Jaku Inggeris.

Sapit Menteri Pelajar, Inovsyen enggau Pemansang Penau Sarawak, Datuk Dr Annuar Rapaee madah, program tu agi ba renggat pun randau begulai enggau universiti sereta kaunsil ukai dikuasa perintah (NGO), tang udah ditemu nyadi mekanisma besai dikena nyarap, ngiring sereta ngenegap nembiak menua pesisir ngambi ke enda tinggal ngasai ke inisiatif pelajar enda bebayar ti deka dipejalaika.

“Enti pelajar enda bebayar dipejalai tang enda datai ngagai nembiak menua pesisir, lalu nya enda nyapai tuju program.

Nembiak menua pesisir engka enda ngasai peluang tu enti kitai enda nyendiaka pelasar ti tegap ari renggat baruh,” ku iya.

Iya madah munyi nya maya bejaku ba Pengawa Masa & Nyua Bantu Pelajar TCS–Yayasan Taqwa ditu, Hari Lima.


Nitih ku iya, nengah program Nembiak Pulai Sekula, universiti enggau kolej di selampur Sarawak deka dipinta ‘ngambu’ siti tauka dua sekula primari, lebih agi ba kandang menua pesisir.

Nembiak institusyen pelajar tinggi deka voluntia nyaup nembiak Primari 3 ngagai Primari 6 ba subjek teras.

“Kitai deka nembiak IPT nyaup baru ngagai rayat. Nembiak universiti deka nyaup nembiak sekula primari, fokus ngagai Matematik, Sains enggau Jaku Inggeris. Program tu mega seriris enggau pejalai program DLP (Dual Language Programme) sereta rindu STEM ke deka diterenak tumu ngagai nembiak sekula,” ku iya.

Program tu disadang dipejalai belabuh taun dudi lalu program ngaul nembiak pelajar tinggi deka diatur maya kemisi semester.

Empat universiti udah ditemu deka ngepun ngena insiatif tu nangkan zon Swinburne University enggau ICATS di zon selatan, UTS di zon tengah, enggau Curtin University bagi zon utara Sarawak.

Nambah ke jaku iya, Dr Annuar madah, bala sida iya agi berandau enggau Opis Pelajar Nengeri Sarawak (JPNS) sereta kaban strategik ba sektor pelajar tinggi dikena ngemujurka pejalai inisiatif tu ba kandang timpuh enam bulan deka datai.-EDISI UKAS