KUCHING: Proses verifikasyen Bantu Belanja Khas (BKK) Sarawak bisi laun ngujungka penyampau peminta nyau betugung, ti manggai 42,000 ti diterima naka diatu.

Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee madah, proses tu begunaka pengawa nisih ti silik laban nya bekaul bantu belanja ke patut diagih ngagai nembiak ke endang patut dibantu.

“Penyampau peminta ti mayuh manggai 42,000 alai proses verifikasyen patut digaga enggau silik laban nya bekaul mata duit. Kitai enggai bantu nya diberi ngagai sida ke enda patut, lalu ba maya ti sama kitai enggai nembiak ke patut nerima enda kena peda,” ku iya.

Iya madah munyi nya ngagai pemberita pengudah ngulu Program Masa & Nyua Bantu Pelajar TCS–Yayasan Taqwa ditu, Hari Lima.

Nitih ku iya, penanggul laun mega bepun ari sida iya patut nentuka peminta bepelasarka surat ari universiti sida empu.

Kitai nyangka proses tu ulih digaga enggau jampat, tang ngira tu keterubah dipejalai, proses begunaka awak. Sepengudah tu, ungkup nembiak ke diatu, enda ibuh agi ngena verifikasyen. Verifikasyen semina dipejalai ungkup nembiak baru minta aja,” ku iya nerang baru.

Datuk Dr Annuar mega madah, hari bulan asal peminta ditutup kena 1 Jun 2025 tang dilanjar ngagai 30 Jun 2025 dikena meri awak ngagai mayuh agi nembiak minta.

Nerang senentang BKK ke dipadah semina semaya bula, Dr Annuar nyemetak madah pekara nya enda betul.

Ungkup penemu mayuh, nembiak Sarawak ke nampung pelajar tinggi ba institusyen pelajar perintah enggau peribit ba selampur Malaysia tau minta BKK belabuh 1 Mei tu tadi.

Bantu sepenyampau RM1,200 setaun nya deka diberi dua kali, iya nya RM600 tetiap semester nengah aplikasyen SPay Global.

Ungkup nembiak di Semenanjung Malaysia, belanja nya tau dipindah ari SPay Global ngagai akaun DuitNow sida.-EDISI UKAS