KUCHING: Perintah Sarawak ransing ngemansangka sitak Kampung Sejijak enggau kandang ngelingi nyadi hab dagang temuai enggau genturung baru ngaul komuniti, nengah projek strategik baka ngaga tebing ai enggau rumah ulih dibeli.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek nya sebagi ari inisiatif ngeranchakka agi aktiviti ekonomi enggau dagang temuai ngena sungai ba menua semak mengeri.
 
Iya mega madah ke pemesai guna ngaga rentayan dagang temuai sungai ti nyambung Sejijak, Satok enggau Siniawan nyadi pematak baru temuai lokal enggau luar.
 
“Uji peragam kitai ulih nepan perau ari Kuching, ngetu makai di Sejijak, udah nya terus ke Siniawan.
 
“Tu ukai semina ngidupka baru budaya sungai, tang mega ngerandang peluang ekonomi ngagai peranak,” ku iya lebuh Pengerami Nangguh Regatta Sejijak 2025 kena Hari Minggu.
 
Berebak enggau nya, iya ngemendarka agih belanja RM20 juta dikena ngemansangka tebing ai ba Kampung Sejijak.
 
Kelimpah ari nya ku iya, Perintah Sarawak mega merambu nirika 100 unit rumah ulih dibeli ba tanah pemesai 30 hektar entara Kampung Sejijak enggau Kampung Paroh.
 
"Projek berumah tu deka disikap perengkaguna infrastruktur pemun baka jalai alun, bekal ai, kuasa karan enggau sistem parit, ti deka dipelanja perintah nengeri magang.
 
"Rayat semina mayar premium tanah RM2,500 enggau bayar rumah nengah jali ulih dibayar. Infrastruktur semua perintah mayar,” terang iya.
 
Ngenang silik ku iya, projek nya mega diperati nampung pemansang ti benung dipejalai ba Kampung Segedup enggau menua semak nya.
 
Ku iya, dikena nambahka rentayan jalai penyambung entara genturung pendiau, perintah mega merambu ngaga jalai baru ti nyambung Jalan Tan Sri Dr. Sulaiman Daud ke Kampung Segedup, Sejijak enggau Paroh, ti disadang ulih ngenyemak takah enggau jam pejalai.
 
“Pengawa tu dikeandal ulih nyemela pemansang entara sitak mengeri enggau menua pesisir, seriris enggau juluk Perintah Sarawak,” ku iya.
 
Sama datai, Tuai Sekretari Politik Premier Sarawa ti nyadi Kaban Kunsil Nengeri (ADUN) Tupong ti mega Chairman Regata Sejijak 2025, Dato Fazzrudin Abdul Rahman, Direktor Opis Parit enggau Entali Ai (JPS) Sarawak Datu Ahmad Denney Ahmad Fauzi, Sapit Datuk Bandar Kuching Selatan Dato Dr. Zaiedi Suhaili, Residen Bagi Menua Kuching Dayang Joanita Azizah Abang Morshidi, Chairman Kaunsil Mengeri Padawan Kaunsilor Tan Kai, Direktor Unit Komunikasi Awam Sarawak, Awang Putrayusrie Awang Redzuan sereta bala bukai. – EDISI UKAS