BINTULU: Sepenyampau RM599,000 diagih ngagai 21 penerima nengah Projek Mit Pemansang Menua Pesisir (MRP) Renggat Kedua ungkup sitak Kunsil Nengeri (DUN) Kemena.

Penerima nya nyengkaum Komiti Pemansang enggau Pengelikun Genturung Pendiau (JKKK), gerempung ukai dikuasa perintah (NGO), kelab enggau gerempung.

Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom ngarapka agih belanja MRP ti diagih ulih negapka agi pangku pengawa JKKK enggau organisasyen lokal dikena ngeranchak pemansang menua pesisir sereta nyaga pengelantang komuniti lokal.

“MRP ukai semina bantu belanja tang nya mega meransang komuniti menua pesisir ngemansang sitak sida,” ku iya.

Iya madah munyi nya maya bejaku ba Pengawa Nyuaka Agih Belanja MRP ba Opis Betanam Betupi Bagi Menua Bintulu, kena Hari Lima.

Ba lansa bukai, Dato Sri Dr. Stephen Rundi mega ngansak tuai komuniti enggau peranak rumah panjai ngemeratka pengelikun kelebih agi maya musin kemarau.

Ku iya, nyentuk tengan taun aja, bisi lima rumah panjai di Pelilih Sebauh udah angus ti dipechaya bepun ari penanggul sistem tali karan sereta langkar tengkebang rumah panjai ti kurang likun.

“Rumah panjai ti digaga meseti nitihka atur pengelikun nyengkaum ngelekat fire breaker enggau ngena sistem tali karan ti engkeman.

“Pengawa ngena kereban baka aircond enggau peti ais dalam sistem single-phase ulih ngasuh penusah angus nyadi,” ku iya.

Pia mega, Kaban Kunsil Nengeri (ADUN) Kemena nya ngelalau sebarang pengawa ngentak rumah panjai baru nentuka status ngempu tanah baka tanah Adat Bansa Asal (NCR), Pajakan Sementara (PL) tauka Pajakan Negeri (LP) meseti dikenuku dulu dikena nyeliahka sebarang isu dudi hari.

“Pekara tu beguna amat ngambi nadai penyarut nyadi ila lalu semua perambu pemansang ulih dipejalai berurun agi,” ku iya baru.

Sama datai iya nya Pegawai Atur Pengawa Opis Pelilih Sebauh, Frances Sherri Lia Jilan enggau Sekretari Politik Premier Sarawak, Colin Patan.-EDISI UKAS


Gambar kredit: Utusan Sarawak