SPAOH: Inisiatif ngangkatka sitak Bukit Saban nyadi tibang pemakai deka chakah agi dipejalai taun baru, disukung agih belanja RM60 juta ari Agensi Pemansang Bagi Menua Betong (BDDA).
 
Sapit Premier Sarawak, Datuk Amar Douglas Uggah Embas madah munyi nya lebuh baum enggau komiti PBB Pampang Bukit Saban di Rh Mendit Unsu di Penom, ditu Hari Empat.
 
"Rayat kitai meseti diembing ngerebut peluang ke bisi dalam sektor ti dipilih sida,” ku Datuk Amar Douglas Uggah, seraya madah, pengawa ti udah dikelala ungkup pemansang nyengkaum nanam  sawit, lada, padi, buah enggau sayur sereta nupi manuk enggau jani.
 
Kelimpah ari nya, industri kotej baka baking enggau sulam Baju Dero mega dikelaku.
 
Dikena nyukung makit produk menua, Datuk Amar Douglas Uggah madah ke palan ngumpul, nginjin enggau nungkus beungkus RM17 juta di Bebuling nyau deka tembu.
 
“Kami benung bebelika kereban diguna, baka mesin ngerangkai, nungkus enggau meku. Lalu Bebuling STOLport disadang ngepun operasyen bulan Ogos taun baru, deka meri jalai ti jampat agi ungkup eksport produk udah tembu,” ku iya.
 
Gerempung Peladang enggau sekeda agensi bukai mega deka mantu ngiga makit ungkup produk nya.
 
Berebak enggau nya, Datuk Amar Douglas Uggah udah ngabas taba projek ngaga jematan Sungai Paku lalu beratika pejalai pengawa dia.

Jematan sepanjai 107 meter beungkus RM36 juta nya diatu 41 peratus tembu enggau tumu agi ari taga asal.
 
Taja ditaga tembu Oktober taun baru, Datuk Amar Douglas Uggah madah ke pengandal diri ngagai kunteriktor ulih nembuka projek manggai bulan Ogos.
 
Iya mega bisi limpang ngabas pengawa nyeleti jalai tama ke benung digaga di SK Paku Sentral, ke alai perintah udah ngagihka belanja RM500,000. -UKASnews